about us banner

對不起 誤會你⋯⋯伊朗

古波斯(現今伊朗)居魯士大帝係2550年前建立世界上第一個帝國⋯⋯「波斯帝國」, 東征西討,東邊去到印度,西邊直達地中海沿岸巴爾幹半島,南邊去到非洲埃及,佢哋嘅歷史源遠流長,經過多個王朝繁盛同衰落,直至1979年由當時精神領袖阿亞圖拉、霍梅尼(或稱高美尼)革命成功推翻末代王朝⋯⋯巴列維王朝,成立伊朗伊斯蘭共和國。

Edco C.
2020-Sep-03 12:09

伊斯法罕星期五清真寺 全國最大伊斯法罕星期五清真寺(Jamie Mosque-Isfahan)

設拉子-莫克清真寺

設拉子-莫克清真寺又名粉紅清真寺(Nasir ol Molk Mosque, Shiraz )

阿茲德-杜維拉特阿巴德庭園 阿茲德-杜維拉特阿巴德庭園(Dowlat Abad Complex,Yazd)

伊朗地勢偏高,平均海拔都千米之上,所以佢哋水源多數來自高山融雪或收集雨水引入河流,有河水就自然有橋樑,喺伊斯法罕嘅札因代河上就已經有七條橋樑,其中最出名嘅就係哈鳩橋同三十三孔橋,我唔講佢有幾靚,係講佢有幾「恐怖」。話說有一晚我夜探伊斯法罕,因為好多旅客都講佢哋河邊夜景好靚,所以我就做獨行俠去到河邊「探秘」。當去到哈鳩橋附近時,突然遠遠傳嚟一陣憂怨歌聲,但突然間又停咗,雖然有啲驚但又好奇想知發生咩事,越行越近,但啲歌聲就繼續時有時停,當行到哈鳩橋時候發覺別有洞天,原來當地人每晚都會嚟到呢條橋底下家庭聚會,因為當河水流過橋底特別涼快(不過由於地球暖化,搞到條行河成日都冇水, 不過我慶幸見到有河水嘅景色)亦有人喺橋底下唱歌練聲,原來喺十六世紀興建橋樑嘅時間橋底做到非常好嘅回聲效果,所以就發生「夜半歌聲」嘅「恐怖經驗」⋯⋯哈哈哈!

伊斯法罕-哈鳩橋 伊斯法罕-哈鳩橋(Khaju Bridge, Isfahan)

伊斯法罕-三十三孔橋

伊斯法罕-三十三孔橋的日與夜(Siosepol Bridge - Isfahan )

當我每次同朋友講去伊朗,佢哋即時就會眼碌碌咁望住我,然後就會話嗰度打仗,做乜去埋呢啲鬼地方等等嘅說話。其實有幾多人真係了解伊朗呢個地方?首先大家要知道,伊朗對上一次戰爭係同伊拉克於1980至1988年發生,之後已經冇同其他國家有嚴重嘅軍事衝突。而大家經常喺電視收到嘅訊息,其實都係某某國家元首同伊朗政府「隔空語言衝突」,從來都冇實際軍事行動,但為咗保衛家園,所以周圍都有軍人警察駐守,慎防有「不速之客」到訪查探!但當去到部份觀光景點都會見到軍人駐守,其實佢哋只係擔當警衛工作,甚至有啲識簡單英文對答協助遊客,非常友善,仲有幾次主動充當攝影師幫我影相,真係又驚又喜!

伊朗建築特色

伊朗建築都係由玻璃、瓷磚、花園、水池四大元素興建

大家要知道伊朗被國際制裁咗咁多年,國家發展緩慢,又缺乏外國投資(你唔會見到國際連鎖快餐店),但並不等於國家貧窮,因為佢哋擁有大量石油同天然氣輸出去賺錢。另外,佢哋亦唔係井底之蛙,因為喺國內已經睇到好多國際電視台,例如BBC、CNN、日本NHK甚至中國CCTV都收到,所以好多國際資訊佢哋都知道。又例如好多人以為伊朗同美國關係唔好,境內就絕對無美國貨,但其實美國出名嘅汽水品牌竟然有喺伊朗設廠,唔洗只係飲當地嘅「土炮」汽水,據我所知,伊朗亦有經銷「生果牌」嘅手提電話,只要唔係直銷就冇話唔得嘅!另外當地人已經常用「翻牆VPN」上網,Facebook、Instagram、Twitter並不是奇聞,不過始終Wi-Fi上網係伊朗仍未普及,但比古巴已經好好多!

崇洋飲品

佢哋都好「崇洋」㗎

我記得初去伊朗嘅時候感覺都唔係太良好,因為我見到街上不論男女都係個鼻上面貼咗膠布,跟住我問導遊叔叔伊朗人係咪好鍾意打交,搞到成日整親個鼻?跟住佢哈哈笑咗一聲,然後話我知「呢啲就係有錢人嘅象徵」⋯⋯因為佢哋剛剛去咗「隆鼻」,所以要喺傷口貼住膠布。本身伊朗人嘅輪廓已經好靚,不過再「修理」埋個鼻,令到五官更加突出,而呢個小手術絕對唔平,由$1500-5000美金都有,唔係有錢人又點整到吖! 有人會問,點解唔係整「靈魂之窗」呢?原來伊朗有個禁忌就係千祈唔好稱讚對方雙眼有幾靚,尤其喺小朋友,因為覺得如果對眼太靚係會帶嚟厄運,甚至相傳有啲父母會俾錢搵人將小朋友隻眼挖走😖,所以記得只可以稱讚當地人個鼻有幾靚呀!

iran people

你估佢哋有邊個鼻「真」嘅?

當你有機會去伊朗旅遊,嘗試了解及同接觸當地人,你就會感覺到佢哋嘅熱情同友善(有時甚至過份熱情),當地人非常喜歡同遊客交流接觸,問吓我哋對伊朗係咪想像中咁緊張同神秘,甚至分享佢哋手上嘅美食,拍照留念。當你見到一個伊朗學生想同佢影相,結果就會引來成班同學一齊合照👇🏼👇🏼👇🏼

德克蘭-自由紀念塔 德克蘭-自由紀念塔(Azadi Tower, Tehran)

伊朗嘅美不單止係佢嘅名勝古蹟咁簡單,而係由2500年前文化歷史不斷變更同融和營造出到而家嘅面貌,強悍而友善嘅伊朗人令到我哋對佢哋有不同程度嘅誤解;其實伊朗並唔係我哋想像中保守、落後、貧窮甚至戰亂⋯⋯所以大家只可以對你講一句⋯⋯「對不起,我誤會你」!

#iran
#伊朗
#伊朗建築
#伊斯法罕
#Isfahan
#伊斯法罕星期五清真寺
#Jamie Mosque-Isfahan
#伊斯法罕-三十三孔橋
#Siosepol Bridge - Isfahan
#伊斯法罕-哈鳩橋
#Khaju Bridge, Isfahan
#德克蘭-自由紀念塔
#Azadi Tower, Tehran
#阿茲德-杜維拉特阿巴德庭園
#Dowlat Abad Complex_Yazd
#設拉子-莫克清真寺
#Nasir ol Molk Mosque Shiraz
#設拉子-粉紅清真寺

 
金怡假期 - 顧客查詢

你想收到最新優惠信息嗎?
下一位 團費