about us banner

好想去旅行篇。綠悠悠之紐西蘭遊記-Part 1

真係好想去旅行啊!!!

一直以為疫情會好快過,點知就嚴重到連出入境都被限制,旅行既心蠢蠢欲動,真係好想即刻買機票去一轉話走就走既旅行。突然諗起之前同一大班朋友去紐西蘭玩,真係好回味,好想再去多次,今日同大家分享下我既紐西蘭遊記。

Venus C.
2020-Sep-10 12:09

5月既紐西蘭開始進入冬天,日頭通常十幾度,夜晚最凍可以去到零度

紐西蘭係南半球,四季時間同香港完全相反,如果想春天黎紐西蘭,就要係香港既秋天出發。除了冬天,其他季節既白天時間好長,如果有體力既話可以將每日活動時間拉長,有更充裕既時間欣賞每個景點。

NZ from plane

一大朝早係奧克蘭落機,周圍既店舖都未開門,貼心既領隊為我地安排左簡單又飽肚既早餐 :)

breakfast box

以下落黎我會為大家介紹有咩必去景點,以及我既 "去後感"。

第一站我地會去位於奧克蘭既伊甸山 (Mount Eden),佢既火山地形可以比我地俯瞰整個奧克蘭城市,綠悠悠既草地顯得特別可愛。

MT EDEN1

MT EDEN4

行到附近既街道,成街都係小動物,大鄉里出城既我忍唔住大叫一聲: 天啊好可愛!!!! 係度生活既小朋友一定好開心好健康,同"有錢都買唔到"既大自然環境&小動物一齊成長,實在太幸福喇 !

DUCK3

Auckland War Memorial Museum Auckland War memorial museum

黃昏時間行到去奧克蘭市中心 (Auckland Downtown),呢度好多舖頭、超市通常係下午五點左右打烊,如果想買野就要留意時間。

auckland downtown

隨後我地上左高達328米、南半球最高既建築物 : 天空塔 (Skytower) 。 我地只係用左40秒就搭到電梯上寮望台,透過玻璃地板望落去,一邊食飯、一邊欣賞日落美景,真係好壯觀 ! 食完晚飯,我地係奧克蘭港口漫步,沿途欣賞Skytower同海景,真係好relax。

SKYTOWER3

一早起身,坐左兩個鐘車去紐西蘭北島既馬塔小鎮,參觀魔戒電影場景 : 哈比人村莊 (Hobbiton Movie Set) 。 Hobbiton 地址:501 Buckland Rd, Hinuera Matamata 3472, New Zealand

Hobbiton

《魔戒》導演Peter Jackson發現呢度好接近故事作者Tolkien所描述既哈比村莊,於是動土興建出37間哈比人居住既小洞、農田和村莊。 事隔10多年,村莊保養可謂極之完善,每個只有4至5呎高的哈比洞前,種滿色彩絢爛既花朵,特色圓形大門、窗前擺設,以至山坡上的煙囪同衣架等細節位,都做得好逼真,係青葱山坡襯托下,令人置身係電影入面既哈比人世界。

Hobbiton5

之後我地去左湖畔對岸既Party Tree(電影中經常開派對既綠龍酒館) 參觀,內裏有熟悉既火爐、拱門同餐椅等擺設,大家可盡情影相之餘,仲可以享用一杯免費既酒 (Amber Ale / Traditional English Ale / Apple Cider / Ginger Beer <不含酒精>)。 三五知己坐係火爐前,幻想自己係戲入面既角色,暢談點樣對付敵人,真係好治癒啊~

Hobbiton4

下一個必去景點係Rotorua (羅托路亞)。

呢度最為人所知既,就係超自然景觀 :「地熱」。Rotorua豐富既地熱景觀同硫磺溫泉好出名,佢既地熱溫泉更有治療疾病既功用。除左「地熱」,呢度既湖濱夕陽同純淨單一既湖景足以令我終身難忘。番到香港,每次有壓力既時候,就會諗番起Rotorua美景,為我心中帶來一絲平靜,真係好想再黎多次。

rotorua

每張相都好似人間仙境....

rotorua5

離開Rotorua既路途上,發覺羊仲多過人,廣大多樣既自然景觀、加上完善既旅遊相關設施同道路,紐西蘭簡直係戶外旅遊天堂,好適合自己開車環島遊,由年輕背包客,一家大細,到退休人士都好適合。

camp site

晚餐我地食左紐西蘭既必吃美食 : 炸魚薯條(Fish & Chips),價格唔超過$10紐幣,食晒一個餐都好飽。

fish&chips

雖然紐西蘭周街都係羊,但難得黎到紐西蘭北島既第4日,又點可以唔去Rotorua既愛歌頓農場(Agrodome)探下D羊仔呀? 至少可以一次過睇到十九個品種既羊,邊摸邊影相,仲可以品嘗紐西蘭農場自產蜂蜜+ 特色奇異果汁...一個字 : 正!

Agrodome Address: 141 Western Road, Ngongotaha, Rotorua 3010, New Zealand

農場每天表演三場,我參加既場次係2:30 - 3:40PM 農場show

主持人先介紹綿羊品種,等大家見識到綿羊原來都有好多品種架! 然後就開始剃羊毛,無幾耐隻綿羊就蛻變成一隻無毛的綿羊喇...哈哈哈!

Agrodome3

第五天我地去南島啦, Part 2 再講啦....

#New Zealand
#紐西蘭
#Mount Eden
#奧克蘭既伊甸山
#Auckland
#Skytower
#天空塔
#Hobbiton
#馬塔小鎮
#魔戒電影拍攝地
#Rotorua
#羅托路亞
#歌頓農場
#Agrodome

 
金怡假期 - 顧客查詢

你想收到最新優惠信息嗎?
下一位 團費