about us banner

點解唔好去古巴⋯

⋯⋯因為你會深深咁愛上佢

我雖然去過古巴好幾次,但係仍然覺得仲有好多地方可以玩,需要多啲時間去了解呢一個世界上寥寥可數嘅共產國家!

Edco C.
2020-Jul-28 12:07

photo 1

當我第一次踏出何塞·馬蒂國際機場(夏灣拿國際機場)嘅時候,我嘅感覺就係「嘩,個機場係咁大㗎喇」,冇辦法啦,古巴由60年代開始被多國制裁,遊客大量減少,冇收入又點去擴建機場,直至2014年12月開始同鄰國關係有改善,遊客開始蜂擁而至,希望有一日會有新機場啦!

photo 2

去古巴嘅遊客會因為唔同嘅年齡界別會有唔同嘅感受,大約分為80前同80後出世兩類。80年前,感受過未開放時候嘅中國,對於古巴嘅現況比較了解同容易接受,繼而懷緬過去,好有似曾相識嘅感覺,好似返咗70年代嘅廣州一樣,呢個亦都係佢可愛之處。 至於80年後出世嘅,感覺自不然冇咁強烈,甚至覺得比較落後(因為周圍都冇Wi-Fi),故未能體會古巴迷人之處!

photo 4

到達古巴第一個印象,就是周圍都好多古董車,這個亦都是旅遊古巴必做的一件事,黃昏時分,坐於開篷古董車沿着海濱大道漫遊新、舊夏灣拿之景色,尤其是我哋亞洲遊客仲唔係咁多,更引起不少好奇目光,熱情的古巴人不斷向遊客揮手示好,喺紅綠燈停車時更希望同遊客合照作紀念已經好滿足,亦都冇問我哋攞小費,可見得古巴人嘅真性情(但旅客仍然需要討價還價喎!)

photo-car

鍾意飲酒嘅我,嚟到呢個國家真係又愛又恨,愛⋯⋯你可以天天餐餐都飲酒,恨⋯⋯就是天天飲嘅大多數係古巴出產嘅「土炮」,例如冧酒或稱蘭姆酒 (Rum),酒精含量有成40度,喺咁多個選擇當中,當然最出名嘅就係Havana Club ,甚至有佢哋自己嘅博物館,參觀嘅時候仲會俾你試飲。

photo wine

但用Rum酒做嘅Cocktail就更加世界知名,例如有周杰倫嘅新歌⋯⋯Mojito,就係來自古巴,仲有Pina Colada、Daiquiri⋯⋯。當你去到餐廳食飯,點完餐之後,侍應就會送上一杯冇酒精嘅Mojito俾你,而手上就揸住一支Rum酒,只要你一個指示,佢就開始加入你杯Mojito中,直至你叫停為止,只要客人開心,佢哋就毫不吝嗇咁斟俾你⋯⋯實在太開心啦!

有一次我去到一個休息站,見到好多人都捧住個菠蘿喺度飲,當時係早上10點左右,我諗呢個可能係佢哋嘅早餐菠蘿特飲,我又買過嚟試吓,原來就係另外一個古巴Cocktail~ Pina Colada,當然亦有無限量嘅Rum酒啦,飲完之後嗰日心情特別好⋯⋯哈哈,好彩冇醉! 除此之外亦有人加入可樂一齊飲,你會問:古巴同美國關係唔好,點會有可樂呀?當然有啦,「土炮可樂」吖嘛!

photo-Pina

photo-mojito

photo-local cola

雖然古巴仍然係一個共產國家,仲有好多嘢需要改善同進步,但亦都係因為呢個原因,先可以感受到最「真」嘅一面,揀得去呢度玩嘅,就係希望得到另一種旅遊經驗,滿足旅客嘅另類要求!

所以點解唔好去古巴⋯⋯ ⋯⋯因為你會感受到另外一種其他國家比唔到你嘅旅遊經驗,令你更加想了解佢!

#古巴
#cuba
#夏灣拿
#古董車
#Pina Colada
#Daiquiri
#Mojito

 
金怡假期 - 顧客查詢

你想收到最新優惠信息嗎?
下一位 團費