圖片來源: news.now.com

希臘呢個地方總係俾人感覺悠閒自在、享受浪漫，如果你冇預備好以上嘅「旅遊心情」，結果你只會每日喺度發脾氣，影響自己假期，失望嘅只係你自己。

希臘小島每一個角落都會有貓嘅足跡

相信好多遊客出發之前都會睇咗好多旅遊天書或者旅遊blog，但係寫呢啲旅遊經驗嘅人可能只係去過一次，隨住個次旅遊經歴嘅好與壞，寫成一個令人雀躍萬分充滿期待，又或者臨陣退縮嘅決定，但相同嘅經驗未必在每一個遊客身上都同樣發生！

我自2000年開始，因工作關係踏足過希臘無數次，亦未敢自稱為旅遊達人，每次嘅經歴都有盡興亦有失望，所以出發前應要先了解一下希臘人對事情嘅從容，同隨遇而安嘅心情。如果用我哋喺香港慣常緊張而又急趕嘅心態及生活模式，去到當地就自不然覺得事事不如意，倒不如嘗試放開心情去享受一個藍天白雲、吃喝玩樂、夜夜笙歌、充滿浪漫風情嘅希臘吧！

米可諾斯島(Mykonos Island)

講到希臘人嘅悠閒生活，不得不提佢哋每日下午必有「午睡時間~ Siesta」嘅習慣。一般南歐國家如意大利、西班牙、葡萄牙、希臘等國家都比較慢活。我曾經問幾個希臘朋友點解有呢個「安排」，佢哋話食完午飯，幾杯落肚（希臘人任何時候都喜歡飲酒），加上下午天氣比較熱，不如休息一下先至繼續返工。而晚飯慣常9時後才開始，吃兩三小時等閑事，晚晚咁夜瞓，明早又要返工，晏晝又點會唔眼瞓吖。所以如果去希臘旅遊，需要留意各城市與小島嘅「午睡時間」及每月每天工作之時間均不同，以免影響行程或錯過購物時間！

聖淘維尼島(Santorini Island)

鍾意飲飲食食嘅我，下一次會同大家講下點去揾希臘美酒佳餚，有平有貴，豐儉由人！